Неодговорени прашања до Премиерот

Околу Нова година стално има обраќања на највисоките политички фигури на државата. Во Парламентот се обрати Претседателот ни - се исфали себе и своите, не примети никава аномалија во власта. Премиерот гостуваше во две ток шоу емисии, имаше кратко интервју за Нова Македонија. Останатите медиуми се лутат на ваквата практика на Премиерот да ги игнорира останатите медиуми, притоа да ги дели на „провладини“ и „опозициски“. Некој во јавна дебата рече дека замислите кога Обама би се обраќал на американската јавност само на Ток шоу на Џери Спрингер !?.           Повеќе ».....


Се потрудив да го подигнам на нет обраќањето на Премиерот од интервјуто во Јади Бурек:

• Во делот за спорот со Грција околу нашето име и
• Во делот за економијата ни

На овој пост ке им дадам место на прашањата на Дневик. Во денешното издание на Дневник ги поставија овие прашања:

1. Дали е задоволен од ефектот на министрите за странски инвестиции? Колку инвеститори донесе владата на Груевски во 2009 година? Ако оправдување е кризата, дали знае колку инвестиции за време на кризната 2009 влегоа во соседните земји?
2. Дали ќе продолжи да ги троши народните пари за реклами по глобалните медиуми и за економски промотори без особени резултати, наместо претходно да ги реши клучните предуслови за странски инвестиции - влез во НАТО, преговори со ЕУ, независно судство, правна сигурност, елиминирање нелојална конкуренција и корупција?
3. Дали кај премиерот никогаш не се јавил сомнеж како една иста фирма, патем маркетинг-агенција, победува на државни и на локални огласи за јавни набавки од украсување плоштади, преку шиење маици, па се' до набавување панцири?
4. Каде е луксузниот хотел зад „Рамстор“, кој требаше да биде готов до есенва? 
5. Колку вкупно пари досега се потрошени за проектот „Компјутер за секое дете“? Колку вкупно компјутери се набавени, каде се и зошто децата во голем број училишта се' уште немаат компјутер пред себе?
6. Зошто владата одлучи најфреквентните патарини да ги даде под концесија, без обврска на концесионерот да ги изгради и одржува и патиштата?
7. Зошто и покрај заложбите за мала и ефикасна администрација дозволи нови вработувања со што државниот апарат се искачи на бројки највисоки во историјата, што тој го претставува како намалување на невработеноста?
8. Зошто наместо сеопфатна политика на меѓуетничка интеграција, води политика на дневно гаснење пожари со ад-хок средби со коалицискиот партнер? 
9. За концентрацијата на целата власт во негови раце и фактот дека сам одлучува за многу работи, Груевски неодамна рече дека „не смета оти е автократ, туку добар менаџер“ бидејќи „премиерот е должен да ги следи проектите“. Дали не мисли дека со ова тврдење си го урива митот дека е добар економист? Економската наука за успешен менаџер го смета тој што ќе постави успешни и способни луѓе во секторите на компанијата, а не тој што има директна контрола над сите проекти.
10. Горд ли е кога ја гледа или слуша МРТ? Така ли треба да изгледа јавен сервис во земја-кандидатка за членство во ЕУ?
11. Дали знае дека додека им зборуваше на Миленко и на Јанко за милионски инвестиции во здравството и тоа се' уште во најава, болните во велешката болница, на пример, буквално се смрзнуваа?
12. Дали казнувањето по секоја цена на граѓаните и на фирмите е за да го полни полупразниот буџет? Само со една вечерна прошетка, на пример, по скопскиот булевар Партизански одреди ќе ја увиди селективноста со која се прави тоа.
13. Зошто молчи за инсистирањето на бугарската влада декларацијата за добрососедство од 1999 година во најскоро време да прерасне во договор за што официјална Софија му доставила и предлог-документ? Македонската јавност не чула ни збор за ова од својот премиер.
14. Како се случи Бугарија од земја со безрезервна поддршка за евроатлантските интеграции на Македонија да стане земја со условена поддршка?
15. Ја разбира ли пораката од тоа што српските екскурзијанти на чело со српскиот вицепремиер Ѓелиќ во Брисел ги дочекаа Оли Рен и Билстром, во Рим - Франко Фратини, а нашите во Париз добија ниво - портпарол на МНР?
16. Зошто нема ниту обид да се постигне внатрешно единство за да се засили македонската позиција во преговорите за името?
17. Зошто за името дава интервјуа само кај тие што се декларираа како „чувари на уставното име“, а одбива дебата со тие што се залагаат за компромис?
18. Дали партијата или Владата на кој било начин ги финансираат институтите и кампањите за напуштање на преговорите? Која е вистинската политика на ВМРО-ДПМНЕ - таа што затскриено ги помага протестите пред зградата на ЕУ или таа што организира прослави за визната либерализација?
19. Дали на обвинувањата што ги шири неговата партија дека новинари зеле пари за да застапуваат грчки ставови за името, по аналогија може да се каже дека и државното водство што ја уништи македонската позиција во корист на Грција, ги изгуби симпатиите и статусот на жртва во спорот и направи од готово - вересија со приемот во НАТО под привременото име, зело пари за тоа?
20. Каква полза има Македонија од внатрешната констатација дека Грција не сака да се реши спорот? Како планира да ги разобличи во меѓународни рамки ригидните грчки позиции и да ги врати симпатиите на наша страна?
21. Што се случи со битките за правата на децата-бегалци од Егејска Македонија? Дали писмата и најавите за адвокатска помош беа само маркетинг за домашни политички поени? ...

• ГРУЕВСКИ - итервју во Јади Бурек - дел за името ... неможе и во Грција и во Македонија да има Македонци ... 
• ГРУЕВСКИ ЗА ЕКОНОМИЈАТА - во интервјуто во Јади Бурек ... Македонија спаѓа во група на земји со ниско задолжување и не е точно дека имаме обемен буџет  
• ЗА БУЏЕТОТ НА РМ - во интервјуто на Премиерот кај Јанко Илковски во емисијата Јади Бурек ... “Диригиран Државен Социјализам“
• ГРУЕВСКИ - на народот му се обраќа во народни емисии ... Од што се плашат Грција и Бугарија, од севкупноста на Македонија ли ?