Фуере за Монополот на МТ

Фуере: Урнете го монополот на Телеком

Европската Комисија вчера уште еднаш побара да се урне монополот на Телеком за да се отвори телекомуникацискиот пазар во земјава.

Ерван Фуере, специјалниот претставник на делегацијата на ЕК во Македонија изјави дека Комисијата не е задоволна од либерализацијата во телекомуникацискиот сектор и бара веднаш да се укинат концесиските договори на Македонски телекомуникации, Мобимак и Космофон.

Оваа порака од Унијата ја пренесе Фуере непосредно пред почетокот на проектот "Техничка помош во телекомуникацискиот сектор" што го финансира Европската агенција за реконструкција (ЕАР).

Специјалниот претставник на ЕУ рече дека процесот на либерализација на телекомуникацискиот пазар во Унијата почнал пред 20 години, а како резултат на тоа во 25 земји-членки веќе работат повеќе од 2.500 фиксни оператори, 93 проценти од Европјаните имаат мобилни телефони, а во осум од земјите-членки таа бројка изнесува сто проценти.

Директорот на Агенцијата за електронски комуникации (АЕК), Коста Трпковски, најави намалување на цените за интерконекција меѓу операторите.