Александар Ицев, информатичар во Google

Многу од нашите информатички мозгови заминаа преку барата. Еден од нив е и Александар Ицев.

Форум прави интервју со него на тема:
“ПРИСТАПОТ НА ИНТЕРНЕТ Е НАЈГОЛЕМ НАЦИОНАЛЕН ИНТЕРЕС“

Интересни идеи на нашиот експерт:
“:..Не постои некоја голема светска сила која станала тоа поради силно развиеното земјоделство. Да го парафразирам Ворен Бафет: "Да им го оставиме производството на патлиџани на другите", алудирајќи на што треба да се фокусира американската економија. Ако Македонија сака да фати приклучок кон развиениот свет, мора да го направи интернетот секојдневие. Прво, државата мора да обезбеди целосна демонополизација во телекомуникацискиот простор. Јас поголем национален интерес не можам да видам во моментов. Второ, мора комплетно да ги направи пристапни секое министерство и секоја државна институција на интернет за секоја најмала апликација што фирмите или граѓаните можат да ја поднесат. Тоа ќе ја зголемува ефикасноста на државниот апарат со светлосни чекори, а со тоа и на целото стопанство.

Не може да имате светски конкурентно стопанство кога вработени во една компанија 60-70% од времето месечно го трошат на бирократски процедури, со државата, банките, јавните претпријатија, судовите итн., кои можат да се завршат за еден ден во месецот, ако има развиена електронска инфраструктура. И под број три, државата мора да го поттикне електронското тргување со огромни даночни олеснувања. Секој граѓанин од Македонија, па ако сакате и од Европа, мора да може да купи производ или да нарача услуга од повеќето македонски фирми преку интернет. Јас многупати велам дека цело време треба да се гледа што прават поспособните и попаметните од тебе..“

Има и други идеи нашиов експерт, и со другите колеги “одлеани мозоци“ од Македонија би сакал да соработува со Македонија - но за тоа вели нема елементарни предуслови...